Garnel Innocent: twa powèm nan Souri bolid

Komedyen, ekriven, powèt, pwofesè, Garnel Innocent, Direktè fondatè "Institution Mixte Pouchinit" fèt 10 fevriye 1973 nan Pòtoprens. Li pibliye plizyè liv tankou Leksife, Lea kokoye ak lòt lodyans (pyès Maurice Sixto yo) ak Souri Bolid. Envite alonè premye edisyon Festi Kreyòl Ayisyen (oktòb 2021) "Centre Culturel Municipal Emmanuel Charlemagne" ap òganize a gen plizyè lòt zèv nan kouti.

1

Tout satelit yo
Ta renmen chita
Sou talon zegywi
Se konsa
Pasyon m vle kenbe
Tas Lanmou w
San lans


2


Jou rèv mwen
Reve anvan l rèv
M ap konfime
Konfimasyon m
Nan venn baton gayak
Pou zèl galaksi
Sispann fè vyolans
Sou simityè vivan

Papòt fidèl
Bibit sou yòyòt


3


Piske devenn tout zwazo
Toutouni
Se remò aksidan
Ki kroche nan bon sans mwen

Chak silans meprizan
Gen sant mwezi
Nan anpwent
Fè ya repase

Dife fize
K ap ranni
Nan dezè a
Kapab pouse
egare
Franchi
Pon fèfòje
Bòs kalandriye plastifye

Littérature
 2021-10-25 |

Partager sur :

Laisser un commentaire
aucun commentaire pour l'instant